موضوعات سابقة
ارسل الموضوع لصديقنها كامل
كل سنة وأنتم طيبين..
الأيام دي بتحتفل بص وطل
بمرور 4 أعوام على ميلادها..
علشان كده قررنا في قمر 14
نحتفل معاكم..
ونقدم لكم على مدار الشهر
أفضل ما قدمنا على مدار
الأعوام الأربع الماضية..
تعالوا نعرف عددنا النهاردة عن إيه
أحيانا يغيب عن البنات إنهم "بنات" مش "أولاد" فبتلاقي البنت بتمشي وتضحك وتلبس كمان زي الولد... وأحيانا ممكن تهزر بصورة "خارجة" أمام أي حد وفي أي وقت!!! ولا تقبل النقد لأنها "حرة" المهم إنها مابتعملش حاجة غلط..!!
طبعا يا بنات "بص وطل" ده أكبر غلط...
علشان كده فكرنا نقابل "سامية علوبة" خبيرة اللياقة و"الإتيكيت" ونسألها: هل فعلا إحنا محتاجين نتعلم "الإتيكيت"؟
يعني إيه إيتكيت؟
الإتيكيت هو فن التعامل مع الآخرين يعني الذوق والأدب... الإتيكيت كمان هو الشطارة في معرفة مفاتيح الناس وازاي نعرف ندخل لهم من أول مقابلة.. الفن ده مهم للاندماج في المجتمع بشكل صحيح.
الإتيكيت بيساعدنا على التفريق بين التصرفات المنفرة وبين السلوك السليم اللي بيقربنا من أصحابنا، بيدخل في الإتيكيت طريقة اللبس والنظافة الشخصية، وطريقة الأكل، وطريقة الضحك، ودرجة علو الصوت.
كلمة "الإتيكيت" في أذهاننا مرتبطة بالأكل بالشوكة والسكينة والمشي بطريقة معينة!!
الإتيكيت طريقة تعاملنا وتصرفاتنا أمام الناس، لكن ده لا ينفي أن كل طبقة من طبقات المجتمع لها تصرفات لائقة وأخرى غير لائقة.. والشطارة أن نكون قادرين على التأقلم، ودي أهم حاجة في "الإتيكيت"، لو مثلاً جمعتنا ظروف بمجتمع بسيط كل الناس فيه لا تستخدم الشوكة والسكينة، لازم أحترم عاداتهم والعكس صحيح.
لكن لازم نعرف إن التأقلم مع أي مجتمع له حدود لأن التأقلم مش معناه التنازل عن المبادئ، أما الأشياء التي أتنازل عنها فهي أي شيء لا يسبب لي ضرراً.
لماذا اتجهت إلى تدريس الإتيكيت؟
بصراحة من الحاجات اللي دفعتني لهذا الاتجاه "بناتي"، بدأت ألاحظ إن "الأنوثة اختفت من البنات.. الموضة إن البنات تلبس زي الأولاد.. البنت بتتكلم وتهزر كأنها "ولد" والغريب إن المدارس لا ترتقي أبداً بمستوى الأولاد، حتى المدارس الراقية جداً البنات والأولاد بيستخدموا في تعبيراتهم الألفاظ الرديئة في اللغة اللي بيتعلموها سواء إنجليزي أو فرنساوي...
النهاردة مفيش اهتمام بطريقة اللبس.. دائما شكلهم "مبهدل" سواء بنات أو أولاد، الكل أصبح يتعامل ويتكلم بشكل غير لائق.. لازم الأولاد والبنات يتعلموا الإتيكيت.
كمان من الحاجات المزعجة جداً غياب -الإحساس بالناس- الكل يفرض نفسه وطريقته على الآخرين بطريقة فجة جداً في كل مكان، من أول ما ننزل من البيت ممكن تقابل حد بيرمي "الزبالة" والناس واقفين!!! بدون أي مراعاة لمشاعر الآخرين، تمشي في الشارع الناس تخبط فيك، العربيات بتكسر على بعض، "السواقة" خلاص بعد ما كانت فن وذوق وأدب أصبحت شطارة وفهلوة ودراع...
لو تركنا الشارع ودخلنا مكان فيه طابور كل واحد بيتعامل على إنه أهم واحد في الطابور.. ماحدش بيستنى حد...
إيه سبب كل السلوكيات غير اللائقة اللي أحيانا بنجاريها ونمارسها بحجة "اشمعنى"؟
جزء كبير يرجع إلى قلة تواجد الأب والأم في البيت بسبب الشغل طول النهار، فطبيعي إن المجهود المبذول لتربية الأولاد قل جداً جداً.. النهارده الأهل في البيت إما مشغولين أو تعبانين أو .....
من أسباب تدني السلوك غياب الحزم سواء في البيت أو في الشارع.. بسهولة ممكن نكسر الإشارة ونسيب "الزبالة" على الرصيف؛ لأننا في داخلنا عارفين أن ماحدش هيحاسبنا، حتى من ينفذ القانون على المخالفين فاقد الثقة في نفسه خايف من العقاب لو فرض الغرامة على حد.. "منطق مقلوب" مع الأسف.
تصرفات غلط بتصدر من البنات؟
من التصرفات غير اللائقة "مضغ اللبان" باستمرار أمام أي أحد.. تصرف مع الأسف سيئ.. "اللبانة" بنمضغها طول النهار وبطريقة -غالبا- ما تكون مقززة... واحنا في الدرس أو واحنا بنكلم حد أكبر مننا، هذا التصرف فيه شيء من قلة الاحترام.
"المشي بالموبايل".. البنات ماشيين وفي إيديهم الموبايل ومفتوح على طول، ده غلط وعيب جداً نقطع كلامنا مع حد كبير عشان نرد على مكالمة مش مهمة، أو ممكن أجريها في وقت تاني.. غلط يكون الأستاذ بيشرح الدرس وموبايلي يرن وأرد على المكالمات.
من غير اللائق أن تكون رنة الموبايل عالية جداً ومزعجة أو تحمل أغنية هابطة، أو مقطع مثلا من مسرحية أو فيلم.
"الكلام بصوت عالٍ" تصرف غير لائق وكمان "الضحكة العالية" جداً حاجة مرفوضة؛ لأنها ممكن تعطي صورة سيئة وانطباعا خاطئا.. نفسي البنات تعرف تعمل إيه وماتعملش إيه.. فيه قلة توعية بين البنات.
من التصرفات غير اللائقة "التشويح بالإيد" أثناء الكلام.. مهم جداً أقلل من حركات جسمي وأنا باتكلم.
بلاش "وشوشة".. عيب جداً نكون واقفين مع مجموعة وتوشوشي حد في ودنه.
يدخل في التصرفات غير اللائقة اختيار ملابس غير محتشمة، أبسط مثال: لبس البنطلون "اللوويست" وهو مع الحركة الكثيرة يكشف الظهر والبطن.
غير اللائق التدخل في حياة الناس الشخصية من أول مقابلة.. لازم يكون فيه حدود، واحترام خصوصية الآخر شيء مهم جداً.
هل دروس الإتيكيت مهمة للبنات.. وليه دايما ننظر للإتيكيت على إنه رفاهية؟!
الإتيكيت مش رفاهية أبداً.. تعلمه ضرورة وكان من المفترض إن البنات يتعلموه في المدارس بطريقة سليمة.
البنت محتاجة تتعلم بعض القواعد العامة في التعامل مع الأولاد وحتى مع أصحابها البنات، مهم تتعلم الإتيكيت، خاصة قبل زواجها عشان تعرف إزاي تتعامل مع عائلة زوجها، إزاي تستقبل الناس، إزاي تعمل عزايم، إزاي تجهز سفرتها وبيتها.. باختصار دايماً تكون في صورة مشرفة أمام الناس، الحاجات دي بتفرق كتير وبتساعد على إنجاح الحياة الزوجية وخاصة لو إن البنت لم تتح لها فرصة تعلم القواعد الأساسية داخل أسرتها.
نصيحتك للبنات!
نفسي يكونوا ملتزمين وعندهم إحساس بالمسئولية تجاه أنفسهم أولاً، وبعد كده الآخرين.
